كتابات

يا ريتك كنتى مِنى


فى الليلة المظلمة يفتقد البدر ،
dania.JPG

هما بيقولوا كده ، ولما تكبرى وتقرى الكلام ده يمكن تفهميه !!
لأ..
أنا عارف انك ذكية وهتفهميه ..
أنتى اكيد هتحسيه زى ما كتبته ،
أصلك وحشانى جداً،
مفيش حد بيوحشنى زيك غير واحده انتى قابلتيها مرة واحده بس ،
أنتى عرفاها ،
مستغربة اكيد أنى أفتكرتك النهارده !!
أصل أنا هقولك ……
فجأة اكتشفت أن ليا حد فى الدنيا يقدر يعادل كمية الحزن والوجع إللى ملانى ،
وافتكرت ضحكتك ،
وأفتكرت كمان أنى بملك ضى بينور ضلمة جوايا ،
صدقينى فجأه ، مش هكدب وأقول أنى كنت بفكر فيكى ..
لأ ؟؟
كنت بفكر فيها ..
وسامحينى عشان دايماً بفتكرك وأنا متضايق ومخنوق وموجوع !!
بس أعمل أيه ؟
زى ما قلتلك أنتى بتعادلى أحزانى وبتهزميها ،
أنتى تقريباً ممكن تمحيها لوقت طويل قوى ،
وكمان عارف أنك هتسامحينى ،
أصل إللى زيك لازم يسامح ويغفر دايماً ،
أصلاً إللى زيك ميعرفش يزعل ولا يشيل من حد ..
محتاجك جداً ،
عاوز أشوفك خالص ،
أصل أنا المرة دى موجوع بجد ،
بعترفلك انا موجوع جامد جداً ، تقريباً كده مكسور !!
عارفة يعنى إيه ؟
مش مهم ،
بس أنا أفتكرتك وهستناكى ،
عاوز أقولك حاجه كمان ،
أنتى أكتر حاجه لما بشوفها وتمر على بالى حتى ببتسم ،
وبيشاركك واحده بس لما بسمع صوتها وهى بتضحك ،
يعنى أنتى حاجه كده جوايا وبتحتلى مكانه كبيرة ،
لوحدك،
عارفه ممكن إللى يقرا غيرك ميفهمش الكلام ده وميحسوش ،
بس لو بص ليكى وشافك يمكن يشوف إللى أنا شايفه ،
بس برضه انا نفسى مش فاهم ساعات إللى بكتبه ،
ولا ببقى متأكد من إللى بعنيه ، .
فاكره لما قلتلك أن يوم ما اتولدت والأيام إللى بتسبقه بتبقى دايماً أيام فى غاية القرف والزهق والملل ،
ودايماً بييجى وبيجيب لى مصايب بشكل أو بأخر،
أعذرينى لو انا طولت عليكى ،
أكيد لسه فيه كلام بس نخليه بينا احنا الأتنين وبس ،
ولو محصلش وشوفتيه هنا برضه هنشره ،
وبعد شوية هتقريه ….
بس واضح أنى لازم أشكر شهر نوفمبر ،
عارفه ليه؟؟
يمكن هقولك بس مش دلوقتى ،
عارفه كمان انى بستناكى ومش بستنى عمرى حد كده ..
وبتمنى انك ، او يا ريتك كنتى منى .
بحبك ووحشتينى .

7 تعليقات »

  1. صعب قوى اوصف احساسي دلوقتى بس تقدر تقول موجوعه بالظبط زى الكلام اللى انت كاتبه ده ….لأ ده مش كتابه ده حوار ذاتى شاركتنا فيه قد ايه الدنيا دى غريبه كل يوم بنقابل بشر وبنفارق بشر بس قليلين جدا اللى بيعلموا جوانا و بيسيبوا حته منهم تفضل توجعنا بفراقهم…وبدون اي اسباب منطقيه تمام زى ما دانيا مأثره فيك كده و زى مانت اكيد مأثر فيها بس تعلقك بطفله بريئه بالشكل ده بيأكد انك لسه محتفظ ببرأه باحسدك عليها انت جميل زيها بالظبط

    تعليق بواسطة مش مهم — ديسمبر 22, 2006 @ 5:25 ص | رد

  2. عارف حسيت كأنك هو وكأنى باسمعه يمكن انت متعرفوش لكن انا اعرفه بيكتب لى كلامك ده وبيحكيه مع كل لحظة صمت ومع كل لحظة كلام
    تصور اول مرة يقولى كلامه على لسان حد تانى!!
    تفتكر ليه
    يمكن نسى الكلام ومبقاش يعرف يقوله فبعتك انت تقوله؟
    بص مش مهم تفهم

    تعليق بواسطة mona — ديسمبر 27, 2006 @ 12:47 ص | رد

  3. […] كان نفسى بقى أسمع منها كل سنة وانت طيب يا مَحَمْد .. أصل زى ما كتبت عنها بالظبط ” يا ريتها كانت منى ” بحس أنها حاجه جميلة ، لأ .. أكتر من جميلة بشوية .. عموماً كان نفسى أسمع صوتها وكنت ممكن أعمل كل حاجه وأى حاجه عشان أشوفها . بس عموماً .. هى هتيجى هنا أو فى أى مكان تانى وهتقرى إللى أنا كتبته وهتحسه تمام زى ما كتبته ، يمكن مكنتش مستنى حد يقولى كل سنة وأنت طيب غيرها وغير حد أفتكر وكتبلى كل سنة وانت طيب واهتم واتصل بيا كمان .. يعنى .. يا ريت السنة دى تبقى أحلى والحمار يغور بقى .. ونبقى خلصنا … يا ريت السنة دى تبقى أحلى لكل الناس ، وتبقى لى زى ما بتمناها . […]

    التنبيهات "Pingback" بواسطة بقالى ربع قرن .. فى هذه الحياة « كتابات — يناير 1, 2007 @ 7:48 ص | رد

  4. ya rab …bgad el snadee 6b2a zay mnta nasfsk feha balzzbt…wkamn 27la sana hya elly btbtdee b3eed meladak….
    ya rab bgad kol elly nafsk fe yat72a2….
    wyrab s76ak 6b2a 27san…

    تعليق بواسطة loby — يناير 5, 2007 @ 1:22 ص | رد

  5. So did Donia call u on new year?

    تعليق بواسطة hoda — يناير 11, 2007 @ 6:28 م | رد

  6. وحشتني يا قمر

    تعليق بواسطة بنت — يناير 15, 2007 @ 11:19 ص | رد

  7. hi.good site.

    تعليق بواسطة billy — فبراير 28, 2007 @ 9:37 م | رد


RSS feed for comments on this post. TrackBack URI

لو فيه حاجه ممكن تتقال.. تتقال هنا

Please log in using one of these methods to post your comment:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

المدونة لدى وردبرس.كوم.

%d مدونون معجبون بهذه: