وياكي بحس بالفرحه

وياكي
بحس بالفرحه
متستغربيش اني بكتبها بفعل اللي حاصل
مش هقولك اني كنت
الحقيقي أني دايماً
الحقيقي اني هفضل… احس معاكي بالفرحه
وكأني عاوز أغني
معاكي
ومتسأليش ليه دلوقتي وأنا أصلاً مش معاكي
بس معاكي بشوف الدنيا بتبتدي
وبتنتهي عندك كمان
وياكي بحس ان الحياه من غير أي أفكار مسبقه
من غير اختبارات، ولا خوف من اللي جي ومش معروف هو عامل ازاي
وعاوز اقولك لو افترقنا… بفرض اننا اصلاً مفترقناش
لازم تتأكدي
ان صورتك محفوره جوايا… ووياكي مبحسش غير بالفرحه، حتى لو ساعات بحس بوجع
الحقيقي اللي جوايا بيظهر قوي
وحياتي بحسها من غيرك مستحيل تكمل
بس عشانك هتكمل
حتى لو مش هتكوني هنا… بافتراض انك هنا أصلاً
حياتي من غيرك ناقصه
الآيام
الليالي
متسألنيش ومتستغربيش
دلوقتي عرفت انك بتوحشيني
اتأكدت تماما
واتأكدت برضه اني مبقلش حاجه، واني دايماً بعاند
وبختار سكك مش بتوصل لحته… ده بفرض اني بختار اساساً
بس لازم تعرفي
ان الحياه من غيرك ناقصه
والبحر اللي بنحبه مبقاش هو نفسه
فيه حاجه دايماً متغيره!
بس
وياكي
بحس بالفرحه وبانك قادره تعادلي كل أوجاعي
ده بفرض انك معايا اصلاً