حالة انتظار

حالة انتظار…
وحاجات كتير مبتنتهيش،
ودايره فيها ناس بتشكل حياتي…
ووداع تقدري تسميه الأخير…
طرق طويله بس مختلفه عن اللي كانت…
مش هشوفك فيها، ولا هتشوفيني…
رحله أو سميها رحيل…
ومتبصيش في عنيا
مش هتلاقي فيهم ولا هتشوفي فيهم اللي اتعودتي عليه!
وحيد هكون…
ويمكن أندم…
ومش هسأل ليه!
بهدوء…
مش عارف أمتى وأنا ببعد عنك؟
أو عني بتبعدي!
كنت فاكرك هنا لكن ملقتكيش…
مفهمتش ليه بس عرفت النتيجه!
وبقلب متقطع…
هبكي!
وورده حمرا دبلانه جنبي!
مش عارف رايح فين…؟
مش قادر افكر أصلاً…
لكن إللي عارفه ان الورده بس وحدها،
هي إللي عارفه…
أنا رايح فين… أصلها راحت من قبلي.