ابريل شهر القضايا والسجن

الشهر الجاى يذكرنى بقضايا كتير وبسجنى ” على رأي اغنية لمتشرب العواتشف محمد فؤاد” الليل الهادئ يذكرنى..

اتسجنت في 2006 في شهر ابريل
وفى 2008 برضه فى شهر ابريل..
والتالته تابته ومش هتسجن في شهر ابريل حتى لو كان شهر ابريل بيفكرنى بالسجن ولو نسمة هواه بتفكرني بهواء طره والمرج..
الاربعاء بعد ما خلصنا من كتب كتاب ايوب المصري علي شيرين عامر بيبلغني احمد راغب ان فيه جلسه متحدة لقضية مترو
وهتكون جلسه للنطق بالحكم..
قالي كمان ان فيه قرار من المستشار فاروق سلطان في ابريل ٢٠٠٨ بتأييد أمر ضبط نسخ “مترو”..

قالي كمان انه بيقترح أداء ما في إدارة جلسات المحاكمة..
وهو أننا منحضرش أول جلسه وناخد حكم غيابى ايا كان ولو مش في صالحنا نعمل معارضة تاني يوم!!
الحقيقة أنا مطمنتش قوي للفكرة دى وخصوصاً إننا منضمنش تصرف الجماعه اياهم وانهم مش مضمونين

وخصوصاً انهم من شهر نوفمبر – الكلام على لسان راغب – بيتم اخطارنا على عناوين غلط!!

كلمت مجدي الشافعي واللي سارع ونشر خبر عن محاكمة مترو علي الفيس بوك
وبدأت الاخبار تتوالي:
القاضي اللي نزلنا قدامه في القضية مش بيأجل وهينطق بالحكم الجلسة دى..
حضر أحمد راغب ومعاه محامين من هشام مبارك عني وعن مجدى الشافعي مؤلف الرواية
وفى الجلسة قال القاضى لمحامين الدفاع انهم يترافعوا..
طلبوا التأجيل للأطلاع فرفض..
فطلبوا منه أجل عشان يجيبوا شهادة من رقم دار الكتب والوثائق القومية برقم ايداع الكتاب ورقم تسجيله
القاضى أجل الجلسه أسبوع واحد فقط لا غير..
يوم السبت 4-4-2009 هتكون الجلسة اللى هيحكم فيها ..
وعشان الحياه تبقي منتهى اللذه فجاء أحد المحامين اللى عاوز شوية شهره وفلوس ورفع علينا دعوى حسبه عشان أحنا –زى ما أتهمنا- بنحض على الرذيله ونقوم باغواء الشباب من خلال كتاب “مترو”
مطلوب التفاف ودعم كل المهتمين بحرية الرأى والتعبير..
بقينا كلنا دلوقتي بين مطرقة المتشددين وسندان السلطة القمعية..

عشان تفتكرو بس ايه اللي حصل ممكن تقروا هناعن اقتحام دار ملامح للنشر وعن مصادرة الرواية