عادى.. ده مجرد كلام

هو دايماً بيقول كده:
” يا جدع ده احنا عايشين فى بلد الواحد فيها لما بيضحك بيمسك قلبه وبيقول اللهم أجعله خير”.
هو دايماً بيحب يقول جمل ومصطلحات ..
أوقات كتيرة بتبقى معبرة عن إللى جواه وساعات بيقول كده برضه جزء من العمل الدعائى والأستعراض إللى بيحب يكون جواه وبيه طول الوقت..
بس إمبارح وفى عز فرحتى فجأه لقيتنى موجوع وحاطط إيدى على صدرى..
بالظبط على ضلعى إللى فيه شرح مش عاوز يلتئم..
ممكن يكون إلتئم خلاص..
بس الوجع لسه جوايا..
لسه حاسس بيه..
إسلام نبيه أخد 3 سنين سجن..
ورضا فتحى أخد برضه 3 سنين سجن..
وعماد الكبير قال أنه حقه رجعله وهو مش عاوز غير كده..
أخد حقه بوائل عبد الفتاح وبناصر أمين وبمدونين مصريين ولا كان يعرفهم ولا كانوا يعرفوه..
وائل وناصر وماك وأسد ونواره ولوبى ووائل عباس وناس كتير كتبوا وتابعوا مكنوش يعرفوه..
بس كانوا حاسين بيه قوى..
وانا كنت بشوفهم..
كنت موجوع لوجعه،ولوجعهم.
ممكن محدش يصدقنى..
بس مش مهم..
هو أنا بكتب دلوقتى لآن اللى جوايا أكبر من إنه يفضل جوايا..
يمكن مش هقدر أوصفه كله ولا أطلعه على الورق كله..
بس أهى مجرد محاولة من محاولات كتيرة ..
عماد أخد حقه وكلنا كنا بنحاول نساعده فى ده..
وائل عبد الفتاح قلب الدنيا وقعد اسبوعين يدور عليه..
وناصر أمين كان بيتحدى الدولة ومعاه وائل..
وكانوا طول الوقت بيضحكوا مع أنهم عارفين ان فيه فاتورة هتتسدد بعد شوية وقت…
وان النظام إللى بيقتل وبيسجن وبيهتك أعراض شعب مسئول عنه ممكن يعمل أى حاجه..
بس الاتنين بيدوروا على معنى وحلم وسط حاجات سودة كتير عايشينها..
ومعاهم شباب من البلد دى..
شباب طول الوقت جيران فى كل حاجه..
فى الوقفة الاحتجاجية بتاعة القضاه وكمان الاعتصام بتاع الصحفيين وبيتابعوا برضه اضرابات العمال وبيحاولوا يكتبوا عن اللى مسكوت عنه..
شباب مش بيحركهم غير حلمهم ببلد أجمل وأفضل..
والأفضل لم يأتى بعد..
وهما مصدقين..
وبيدوروا عليه..
بس خلاص عماد أخد حقه أمبارح..
رجعله أصلاً من زمان يوم ما قال قدام العظيم بكر أحمد بكر ..
أيوة إسلام نبيه ورضا فتحى هما إللى عذبونى وعملوا فيا كذا وكذا وكذا..
راجل قوى الواد عماد..
قال كل إللى جواه..
كان مكسور الولد..
بس قام وقال..
واتخلص من كل إللى جواه..
من الوجع والانكسار والهزيمة والحسرة إللى فضلوا ياكلوا فيه لوقت طويل..
لحد ما راح النيابة ومن قبلها جريدة الفجر وقعد مع وائل وناصر ..
فرحان انا قوى ..
فرحان بيه..
وفرحان ليه..
أخد حقه..
وأفتكرت أن أصحابى برضه كانوا بيحاولوا يرفعوا ورقة-ورفعوها- عايزين فيها حقى وبيطالبوا بيه..
وأنا كنت بقول وقتها..
هونوا على نفسكم يعنى..
أحنا بنعادى نظام..
واحنا بنتهمه..
وأكيد النظام مش هيدينا حقنا..
احنا مش مشكلتنا مش فى شخص على أد ما مشكلتنا أكبر من كده بكتير قوى..
أحنا بنغير بلد..
ولازم ندفع تمن الحب إللى جوانا للبلد دى..
وثمن الانتماء برضه..
وحقنا هيرجعلنا لما ندخل إللى بيعذبوا السجن..
لما نشهر بيهم ونفضحهم..
لما نوقف المحاكمات العسكرية للمدنيين..
لما نعيد صياغة العلاقة بين المصريين..
الحلم كبير قوى..
وعلى أد ما بنحلم لازم نقوم ونتعب..
واحنا تعبنا..
وانا تعبت..
تعبت بجد..
ولا عايش دور البطل ولا الشهيد الحى..
بس أنا اتوجعت واتهنت واتعذبت وطلع عينى..
وكنت بصرخ من الوجع..
سواء جوه قسم الشرطة أو فى زنزانة 8-1 وانا بحاول أنام..
أو جوة زنزانة 1-ب وانا نايم وبحلم بإللى حصلى ..
انا امبارح كنت فرحان قوى..
وقد ما كنت فرحان إلا أنى كنت موجوع..
وجوايا اه مكتومة..
مكنتش قادر أنطق..
أبعت رسايل للناس ابلغها بالحكم..
وأفرح لعماد وأحزن عشانى..
عماد طلع راجل قوى لما قال..
وأنا خفت أنى أقول..
أه حكيت عن إللى حصلى ..
ومقولتش مين ولا رفعت قضية حتى..
أكتفيت أنى أقول أسم مرة هنا ومرة هنا..
بس مقلتش حاجه..
المحصلة النهائية لحركة دائرية طول الوقت = صفر.
وأنا أمبارح كنت موجوع..
كنت فى حضنها بس كنت موجوع..
حاولت كتير أثبتلها إنى خلاص بقيت أحسن ومكنتش قادر أكدب..
وهى عملت حاجات أكتر وبرضه مكنتش عارف أكدب عليها..
مع أنى بعرف أكدب يعنى لو عاوز..
كنت حاسس إنى مكسور..
وهى حاسه وشايفه وعارفه حتى لو مقلتش..
كانت بتقولى اتعلم تقفل الباب..
خلاص..
It’s Over معدش أى حاجه..
اقفل الباب بقى..
فيه نور أهه..
شايفه..
بس أنا مكنتش قادر ولا أقفل الباب ولا ابص عالنور..
مكسور وحاسس بوجع..
بس برضه حاسس بفرحه..
عشان عماد قال أنه حقه رجعله وهو مش عاوز غير كده..

خارج حدود النص:
“سواق التاكسى إللى كنت راكب فيه سامعنى ببلغ الخبر للناس فى التليفون قالى هو ده بتاع مباحث بولاق..
وحكالى انه من فتره وفى الحى اللى ساكن فيه فى شبرا كان فيه فرح،عدت عربية شرطة “بوكس” فى الشارع إللى كان غرقان مية من المطرة وإللى كان فيه الفرح ..
وواحد واقف على الناصية إللى هو أصلاً أبو العريس ..
سواق البوكس من سرعته ومن كتر المية فى الشارع نقلها على وشه وهدومه..
كل إللى قاله الراجل” يعنى يرضى ربنا ده؟؟”،
خرجنا من الفرح لقينا أبو العريس غرقان فى دمه..
فى الشارع إللى كان غرقان ميه من المطره!!
عادى.