أما آن للغريب أن يرى حِماك

1
بحس إنى مطمن ،
بحس بأمان غير عادى،
وقت ما بتعب،
وقت ما بحزن أو أتضايق..
بلاقيها موجوده..
وبتأكد لحظتها أنى كنت بدور عليها،
هى مش أى حد تانى..
لما بكلمها ورغم أننا ممكن يبان أننا بنتخانق إلا أنى طول المكالمة مثلاً بفضل أدور على كلمتين أو..
ببقى عاوز أسمع أى كلمة منهم..
ممكن بيها ينتهى أى حاجه مضايقانى مثلاً.
صحيح أنا يمكن الكلام إللى بيبقى نفسى أسمعه منها سمعته قبل كده ..
إلا أنى بيبقى عندى رغبه ولهفة بتقتلنى عشان أسمعه منها..
يمكن عمرى ما استنيت كلمة من حد أد ما انا عاوز أسمعه منها ..
منها هى بس.
سألتنى مرة أشمعنى أنا؟؟
وليه مش أى حد تانى؟؟؟
ماهو إللى فى حياتك كتير!!
وأحنا مختلفين تماماً….
ده كفايه موضوع ربنا والدين..
والحاجات إللى مش هقدر أقعد أعددها ليك
بس برضه بيفضل الحلم ساكنى،
بيبنيينى…
وهى دايماً موجوده..
ومش بيبقى عندى رد غير إنى مطمن !!
وأنا دلوقتى محتاجلها..
وعندى حاجه ناقصانى .

-2-
25 مايو ،
مقدرش أنكر إن اليوم ده هيفضل علامة فى عمرى كله..
أصله يعنى واضح جداً أنه إختارنى..
مع إنى ما أخترتوش..
أنا أصلاً مش بحب رقم 25 ولا بحب شهر 5..
بدون أى أسباب منطقية للعلم بس..
بس يوم غريب قوى..
بيتحفنى طول الوقت بمصايب..
يمكن طول الوقت المصايب دى بعد كده بتبنى إلا انها بتكسر وبتوجع وبتنهى حاجات تانية..
فى 25 مايو 2005 انتهكوا أعراض الناشطات وسحلونا فى ضريح سعد وعند نقابة المحاميين والصحفيين..
أستحلوا دمنا زى ما طول عمرهم بيعملوا بس المرة دى كانت بفجر شوية..
يعنى ..
حركة التغيير كانت بتموت قبل مايو 2005 مع انها كانت لسه بتحبى بس واضح انهم كانوا هيقتلوها قبل الولادة ..
بس بعد اللى حصل الحركة كبرت وقويت وبدأت تجتذب ناس كتير جداً..
والناس إللى جوه الحركة اتأكدوا تماماً أنهم صح جداً..
ومايو 2006 كان أغرب شوية..
بدأ بأضراب عن الطعام فى سجن طرة لمعتقلى كفايه..
وانتهى بهتك عرضى والتحرش بى جسدياً فى قسم قصر النيل على شوية كلاب من مباحث أمن الدولة ورائد شرطة مسنود من عيلة وزير عدل سابق أيام السادات..
أتوجعت وتعبت وكنت بعيط زى المجنون بس قوة كل إللى حواليا قوتنى جداً..
خلتنى أكتب وأقول على إللى جرالى وأحاول مجرد محاولة أنى أشهر بالنظام وبممارساته إللى تشبه ليه..
مايو 2007 كان مختلف تماماً..
الوضع لآى حد بيشوفنى من بعيد هيقول أنى اتغيرت شوية وبقيت أفضل ومبسوط ومطمن ومرتاح..
وببدأ فى مشروع مختلف برؤية بجد..
إلا ان المشهد كان بجد مأساوى..
الفجر أقتل بأيدى روح ..
أقرر بنفسى أن اتخلص من حاجه كانت يمكن تبقى أفضل حاجه فيا..
حاجه حلوة قوى..
بتمناها طول الوقت..
وبتمناها دلوقتى..
يمكن مبدأتش صح فيها بس المفروض أنى اتعامل مع النتيجة الحتمية والمنطقية للأحداث..
إلا انى معملتش كده..
بإيدى أنا قتلت إللى كنت بتمناه..
مع إنى وقت ما بقى موجود مكنتش مستنيه..
وجعتنى وأنا مقصدش.
ولسه عايش بالوجع..
ويمكن هفضل كتير بالوجع ده..
وفقدان الحلم الأول إللى جالى وأنا مكنتش مستنية..
25 مايو 2007 ومظاهرة هزيلة فى نهاية اليوم ووجود منى بس عشان أقول لكلاب الداخلية إنى مش خايف..
أصل معاها ببقى مطمن..
ببقى مش خايف..

-3-
إيه بقى …
محتاجلك بجد..
وماهو يعنى لازم تقدرى أنى بتغير وأتغيرت..
عشانك..
وسيبك من أى كلام أنت بتعمل ده فى الأساس عشانك..
أنا يا ستى موافق جداً على النتيجة النهائية بس أنا بوصل ليها عشانك مش عشانى..
أقولك..
هو برضه عشانى..
ماهو أنا فى النهاية هبقى معاكى طول ما أنتى مبسوطة ومرتاحة..
بس أنا دلوقتى محتاجلك..
ببقى محتاجلك طول الوقت ..
بفتكرك طول الوقت برضة..
ومش بإيدى صدقينى..
وبعدين هو انا هلاقى زيك فين؟
فين كده قوليلى؟؟؟
مش فى أى حته!!
أنا عارف..
إياكى تكونى فاكرة انى مش عارف..
وعشان كده مستنيكى..
ومحتاجلك..
وايــــــ
أما آن للغريب أن يرى حماك؟