السر – محمد خير

لو كنت عارف حلّها

ما كنتش اتأخر ..

اللعبة دي – للأسف –

مافيهاش تعادل ..

ومكسب واحد فينا يعني خسارة التاني ..

فلو سمحتي

ماتحلّيهاش قبلي ..

وسيبينا نستنى الإجابة

ولو ماجاتش بنفسها

هنسيبها مرمية في آخر العالم ..

هنسيبها تايهة

في الوحدة الحزينة

المضحكة

كأنها اشارة مرور بين الكواكب ..

لحسن الحظ ان الجميع روّحوا ..

ومافيش ورانا

غير شبّاك

مفتوح على الآخر ..

صوت الكروان دة مش تسجيل

وضحك السهرانين في آخر الشارع حقيقي

واللي همستلك بيه من شوية

ماكانش كدب

كان صحيح

اللعبة دي :

مافيهاش انسحاب ..

من ديوان “بارانويا” يصدر قريباً عن دار ميريت