عيد شرطة أسود -25 يناير2007

عمر أقترح تنظيم مظاهرة يوم 25 يناير،
نفس اليوم ده بيوافق ذكرى مهمة جداً فى تاريخنا النضالى كمصريين وهى مقاومة ظباط
شرطة مصريين لدبابات الأحتلال الانجليزى بالاسماعيلية،
بصراحه اليوم ده بقى تكريم لمبارك رئيس المجلس الاعلى للشرطة ،
ولحبيب العادلى وزير الاخلية ،
وبيتكرم فيه شوية لواءات و ظباط ومنهم عدد كبير قتل وعذب مصريين ..
اليوم ده بيتم فيه ما يجعله يوم أسود ،
بيكرم فيه قتله ومجرمين بيرتكبوا جرايم ضد الأنسانية ،
وضد مصريين زيهم ..
فرق كبير بين الظباط اللى استشهدوا يوم 25 يناير 1951 وظباط الشرطة اللى
موجودين دلوقتى- مش هقول كلهم ، لسه فيه ناس بنت ناس متربية ومحترمه وبتقدر
تتعامل بأحترام مع الناس كلها رغم أى شئ !!بس دول ييجوا أيه جنب البقية إللى
بتعذب وبتقتل وبتغتصب وبتنتهك أعراض الناس؟؟دول تقريباً نسبة لا تذكر يا دوبك خمسة فى الالف- بس برضه الداخلية بأدائها المعهود والمعروف عنها من اعتمادها لظاهرة تلفيق القضايا لأى حد وتقفيلها بأى شكل ..
وتعذيبها المستمر والممنهج للمصريين حولت دور الشرطة من حامى لحقوق الشعب إلى منتهك وجلاد ،
وأوقات كتير بتحكم كمان.
الشرطة المصرية وخلال خمسين سنة بتبدأ تتراجع عن دورها فى حماية الشعب ،
منذ ثورة الظباط الاحرار 1952 وجهاز الشرطة بدأ يرتكب مخالفات ،
طبعاً كان فيه كمان تعذيب قبل الثورة بس ده كان معظمة للسياسيين والنشطاء فقط والمعارضين ..
وبرضه فئات محدوده منهم ،
عموماً بيتهيألى أنى عاوز أهنيهم ونهنى نفسنا بعيد الشرطة المجيد،
وبقول لظباط الشرطة إللى بيعذبوا وبيقتلوا مصريين :
عيد شرطة أسود ومطين عليكم ،
وعلى إللى بيسكت على تجاوزاتكم وأنتهاكتكم لحقوق وأدمية المصريين،
عيد شرطة أسود عليك يا أسلام يا نبيه وعلى إللى ربوا سعادتك وعلموك تعتدى على غيرك،
عيد أسود على وليد الدسوقى وحسام سلامة ونبيل العزبى ومحمد شعراوى ونبيل سليم وأحمد العزازى ووائل نور،
عيد أسود عليك يا كل كلب بتمضى قرار اعتقال تشرد بيه أسرة وتسجن راعيها ،
عيد أسود عليك يا أشرف يا صفوت ويا ريت نشوف إللى عملته فى محمد عبد القادر السيد يتعمل فيك ،
عيد أسود عليكم ..
وعلينا احنا كمان ،
هو أحنا أحسن منكم.

 

كريم عامر والنشر على الانترنت.
أتحدد لكريم عامر جلسة يوم 25 يناير 2007 ،
وغالباً هيتحكم عليه ..
بيقولوا هياخد حكم ..
ده هيتسجن عشان قال أرائه الشخصية إللى هو مقتنع بيها وبيدافع عنها ،
مش هيتسجن عشان متلفق له قضية مثلاً ،
ده بجد سجين رأى ،
وهيبقى مطلوب مننا اننا بجد ندافع عن حقه وحقنا فى كتابة كل إللى عاوزينه بالكشل إللى شايفينه،
يعنى نطالب بالحرية ،
بس يعنى ما يسودوهاش ليه علينا ؟؟
يحكموا عليه وتبقى بداية لسلسة أحكام قادمة.
وتنتهك حرية الرأى والتعبير تماماً،
عموماً 25 يناير يوم أسود تماماً .

 

أسد كان أقترح نعمل مظاهرة يوم 25 يناير ..
بصراحه قلتله أنا مش عارف انا ممكن أروح معاك وأعمل أى حاجه فى أى مكان ،
بس اننا نتظاهر فى البيوم ده غفمش عارف ليه قلقان ؟؟
يمكن عشان ده يوم 25 ويمكن عشان ده يوم خميس .. مش عارف .