رامى …… صدقنى مش لاقى كلام ، ومش عارف كل إللى أقدر أقوله ليك دلوقتى يبقى أيه ؟؟؟
شوية كلمات أرصها جنب بعضها مثلاً؟؟
طيب ، وحتى لو كان كلام صعب على أقوله فى مواجهتك .. ما انت أصلاً مش موجود دلوقتى ..
بس صحيح انت مش موجود وممكن متقراش الكلام ده وقت نشره ، بس كل إللى متاكد انى قادر وعايز أقوله ليك هو أنك تسامحنى ..
تعذرنى يعنى .. أصلك مش فاهم .
لما كتبتلك وقلتلك فى الجواب إللى بعتهولك جوة وانت فى حجز ترحيلات الخليفة ” كله هيعدى ” مكنتش أقصد أنى أقويك وكده ، أد ما كان فى بالى أنى أستخدم ده عذر ومبرر لضعفى وعجزى عن مساعدتك وانت فى المحنة دى واللى واثق أنها هتقويك !!
كنت عاوز أقول لنفسى وأوجه لها رسالة أهم من إنى أوجههالك ..
يعنى أقولك كله هيعدى ..
يعنى طولت أو قصرت فبرضة هتعدى،
وممكن بقى بعد ما تركب عربية الترحيلات إللى هترجعك على قسم قصر النيل .. وبعد ما شفتك فى الشارع ماشى بالكلابش ولا أجدعها نصاب ولا حرامى ولا مزور ــ قال يعنى دول بيتمسكوا دولا أقلها يبقوا وزرا أو يحكمونا ويبقوا أولاد الأسرة الحاكمة ــ أنى أروح بيتى الصغير وأقفل بابه عليا وأستمتع بشوية وقت ونوم على سريرى ومش هفكر فى انك نايم مكانك وانت قاعد فى زنزانة 5 متر فى 3 متر وبيشاركك فيها 20 بنى آدم …
ومش هقدر امنع نفسى انى أروح اليونانى او ستلا او الحرية حتى وأشرب بيرة ساقعه – زى ما نورا كتبت لى بالظبط – ومش هفكر فيك لو أنت عطشت فجأه فى الزنزانة هتعمل أيه .. وإنك مش هيبقى قدامك غير حل واحد ..
انك تشرب من حنفية بينها وبين قعدة الحمام البلدى غير 40 سم واللى من غير صرف ..
صدقنى انا لما كتبتلك ان كله هيعدى مكنتش بقصد انى اصبرك على آد ما بدى لنفسى مبرر للتواصل والتفاعل مع الحياة والاستمتاع بيها ..
بس عارف ؟؟؟
رغم كل اللى انا قولته ده إلا انى معرفتش اعمل أى حاجه من دى ..
ويمكن الوقت الوحيد الكويس اللى عدى من ساعة ما انت اتاخدت كنت مع نورا وحمادة شرف فى محل شلبى بتاع الحمام ..
اكيد أنت عارف حماده شرف ..
الوحيد او من القليلين اللى لما بقعد معاهم بحس انى عيل بجد وانه صندوق خبرات متحرك .. وان مشاكل وهموم الدنيا كلها هتعدى وكلها هينة .. وان شوية الايام اللى اتسجنتها كانت مجرد نزهة ليه لما كان بيبقى بيبدل الزنازين مش بيلف عالسجون اللى قضى فيها اكتر من 15 سنة ..
مش مهم ..
انا حسيت ان الوقت كان كويس يا رامى أصل انا كنت باكل من نفس الاكل اللى انت بتاكل منه ..
بصراحه انا نفسى اتفتحت لما قريت جوابك وبصراحة اكتر من ريحة الاكل اللى كنا جايبنهولك انا ونورا وعمر اسد..
الواد ده اكتشاف هايل وبيثبت لى كل يوم انه اختراع متجدد ومفيد وانسان عظيم رغم انه من اتباع من سلف ..
وكمان بقى انا كنت حاسس انى كويس عشان انت بينت ليا انك كويس ..
وأذا كنت انت منعوك من انك تكون معانا زى ما اتعودت فأنا برضه اخوك منعنى انى أكون جنبك ..
فحسيت بقى انى زيك ..
فقدرت اتجاوز يوم كامل بأكتشافى انى زيك او أشبهلك ..
عزلتى جوه نفسى اصعب شوية من اللى بتبقى مفروضة عليا ويمكن تكون أسهل …. مش عارف ؟!!،
أنا زيك يا رامى او كنت زيك ..
ممنوع انى أساعدك ، وباكل نفس أكلك ، وصابر شبه صبرك ..
ياه يا جدع ..
الواحد بيقرب منك شوية وهو مش واخد باله …….
بس عاوز أقولك حاجه ..
عارف ان ممكن ده ميكونش مكانها بس أوانها ..
أنا غضبان يا رامى ، جوايا غضب من تراكمات حاجات كتييييييييييير ..
جوايا حزن كمان .. بس مش حاسس بالوحدة إطلاقاً ..
يعنى لسه حواليا إللى بحبهم .. مش عارف .. المهم دلوقتى سيبك منى ،
وخليك فى نفسك ، متزعلش وسيبها كده وكله هيعدى ..
ومسيرها برضه هتبقى زى ما احنا عايزينها ..
مصر بكرة – طول قوى بكرة ده ومش عاوز ييجى – أحلى .
Very touching… Very honest… very human. Mabrook that Ramy came out safely. Your friends are lucky to have you as a friend.
I would love to read Ramy’s comment to this post. And yes – koll 7aga hat3ady, lazem t3ady, like it or not hat3ady, 7atta el 7agat elly mesh 3ayzenha t3ady hat3addy…
Comment بواسطة ISIS — نوفمبر 23, 2006 @ 7:20 ص |
يا صديقى الجميل .. ” كله هيعدى ” ليست تبريراً لعجزك ، فأنت لم تكن عاجزا ، وقد فعلت معى ما لن انساه ابداً
كله هايعدى مابتحكيش صبرك ولا صبرى ولا عجزك ولا عجزى
كله هيعدى بتحكى ازاى الوقت بيفوت ، الوقت بيفوت غصب عن الجميع ، حلو او وحش لازم بردوا يفوت
اذا كان وقتك انت حلو برا فهو هايفوت، واذا كان وقتى انا وحش جوا فهو بردو هايفوت، ودا السبب اللى بيخلينا برغم ان واحد برا والتانى جوا بنقرب لبعض
وبنحكى عن اوجاع شخصية واحدة وعن صبر ايوب
اما وان اصبحنا احنا الاتنين برا ، مش يبقى نشرب بيرة ساقعة زى ما قالتلك نورا ؟؟
كله هيعدى يا شرقاوى … كله هيعدى
Comment بواسطة ayoub — نوفمبر 26, 2006 @ 1:19 م |
[...] الغالى أينما كان أيوب قرأت فى أخر تعليق لك عندى بأنك تنتظر زجاجة بيرة مثلجة كما قالت نورا [...]
التنبيهات "Pingback" بواسطة أيوب .. فى أنتظارك زجاجات بيرة مثلجة « كتابات — نوفمبر 27, 2006 @ 7:25 م |
[...] الغالى أينما كان أيوب قرأت فى أخر تعليق لك عندى بأنك تنتظر زجاجة بيرة مثلجة كما قالت نورا ولأنك شخص مميز جداً وقريب إلى كذلك ، فتنتظرك زجاجات بيرة مثلجة .. فهل ستأتى ، على العموم سأنتظرك ومعى هؤلاء: الجميع يقولون لك : [...]
التنبيهات "Pingback" بواسطة أيوب .. فى أنتظارك زجاجات بيرة مثلجة « كتابات — نوفمبر 27, 2006 @ 8:43 م |
تغطية رائعه للموضوع
Comment بواسطة mikkaa — ديسمبر 2, 2007 @ 2:46 م |
جزاك الله كل خير ,جعل ذلك فى ميزان حسناتك..
Comment بواسطة worldgames1 — أكتوبر 13, 2008 @ 11:20 م |
بارك الله فيك ووفقك للخير
Comment بواسطة الفارس — مايو 2, 2009 @ 4:38 ص |
اسعد الله ايامك تدوينه رائعه
Comment بواسطة على — مايو 15, 2009 @ 7:10 ص |
اسعدك الله واكرمك ..
Comment بواسطة مروان — مايو 24, 2009 @ 9:46 ص |